Կառավարությունը լրացուցիչ 11 մլն դոլար կհատկացնի Պաշտպանության նախարարությանը

Արմինֆո.  ՀՀ կառավարությունը որոշել է Պաշտպանության նախարարությանը լրացուցիչ հատկացնել 4 մլրդ 371 մլն դրամ (մոտ 11 մլն դոլար): Որոշումը կառավարությունը հաստատել է նոյեմբերի 6-ին։

Ինչպես ասվում է փաստաթղթի հիմնավորման մեջ, նախագծի ընդունումը պայմանավորված է ՀՀ պետական բյուջեով նախատեսված միջոցների առավել արդյունավետ (խնայողաբար) կառավարման, ինչպես նաև ՀՀ պաշտպանության նախարարության կողմից կապիտալ ծախսերի գծով (2025թ.գնումների ծրագրով) ստանձնած մի շարք պայմանագրային պարտավորությունների կատարման անհրաժեշտությամբ:

Ավելի վաղ հաղորդվել էր, որ չնայած հաջորդ տարվա պետբյուջեի նախագծով Հայաստանը նախատեսում է ծախսերն ավելացնել 5 տոկոսով, պաշտպանական ծախսերը կկրճատվեն 15,2 տոկոսով՝ 664,7 մլրդ դրամից մինչեւ 563 մլրդ դրամ (մոտ 1,5 մլրդ ԱՄՆ դոլար): Ինչպես ասվում է հաջորդ տարվա պետբյուջեի նախագծի ուղերձում, 2026 թվականին Հայաստանի պաշտպանության ապահովման ծախսերը, մասնավորապես, զինված ուժերի ռազմավարական տեղակայման ապահովման համար մարտական պատրաստության պահպանումը, արտաքին թշնամիներից պետական սահմանների պաշտպանության ապահովումը, կկազմեն 560 մլրդ 98 մլն դրամ (մոտ 1,46 մլրդ դոլար): Մինչդեռ, ընթացիկ տարում պաշտպանական ոլորտի ծախսերը կկազմեն 664,7 մլրդ դրամ (մոտ 1,73 մլրդ դոլար), ինչը 20 տոկոսով կգերազանցի 2024 թվականի պետական բյուջեով սահմանված պաշտպանական ծախսերը:

Ընդհանուր առմամբ, գալիք տարում պաշտպանության, անվտանգության, հասարակական կարգի պահպանության և դատական գործունեության պետական գանձարանի ծախսերը կկրճատվեն 102,2 մլրդ դրամով (մոտ 267 մլն դոլար): Արդյունքում՝ այդ ուղղությունների ֆինանսավորումը կկազմի 813,2 մլրդ դրամ (մոտ 2,12 մլրդ դոլար) ։ 2025 թվականին այդ ցուցանիշը կազմել է 915,4 մլրդ դրամ, 2024 թվականին ՝ 776,9 մլրդ դրամ ։