Հայաստանի խորհրդարանի ընդդիմությունը հարցում է ուղարկել լիազոր մարմիններին՝ պահանջելով ներկայացնել Հայաստան մատակարարված ղազախական հացահատիկի գինը. պատգամավոր

Արմինֆո.Հայաստանի խորհրդարանի ընդդիմությունը հարցում է ուղարկել պատկան մարմիններին ՝ պահանջելով ներկայացնել Հայաստան մատակարարված ղազախական հացահատիկի գինը: Այդ մասին նոյեմբերի 11-ին լրագրողներին հաղորդել է ԱԺ "Հայաստան" խմբակցության պատգամավոր Գառնիկ Դանիելյանը։

Նրա խոսքով՝ շատ կարեւոր է հասկանալ, թե մատակարարված հացահատիկը որքան կարժենա հայ սպառողների համար։ Պատգամավորը նշել է մատակարարված ապրանքի ինքնարժեքով հաշվարկներ կատարելու անհրաժեշտությունը, հատկապես, հաշվի առնելով, որ հացահատիկ փոխադրող շարժակազմերը հակառակ ուղղությամբ դատարկ են գնացել, իսկ դա հանգեցնում է հացահատիկի ինքնարժեքի լրացուցիչ աճի: Պատգամավորը նաեւ հավելել է, որ հետաքրքիր է իմանալ, թե որքան է արժեցել ցորենի փոխադրումը Վրաստանի տարածքով։ "Հուսով եմ, որ մոտ ժամանակներս մենք կկարողանանք իմանալ միաժամանակյա առաքման իրական պատճառները։ Ոչ պակաս կարևոր նշանակություն ունի հացահատիկի կարգը՝ կեր է, թե ցորեն, որը նախատեսված է հացաբուլկեղենի արտադրության համար", - ասել է ընդդիմադիրը, հավելելով, որ կա այս ամենը պարզաբանելու անհրաժեշտություն, այլ ոչ թե՝ PR ակցիա անցկացնելու։

Նա նշել է տրանսպորտային հաղորդակցությունների ապաշրջափակման վերաբերյալ իշխանությունների պնդումների անհեռանկարային լինելը։ Պատգամավորը նշել է, որ ապաշրջափակման մասին կարելի էր խոսել, եթե բեռն Իջևանի կայարան գար։ Մանավանդ, որ երկաթգծի երկարությունը Ադրբեջանի Քասախից մինչև Հայաստանի Իջևան ընդամենը 10 կմ է: Ընդ որում, գծերը կան, և անհրաժեշտ է միայն տեխնիկական բնույթի աշխատանքներ իրականացնել, ինչը թույլ կտար շատ կարճ ժամանակահատվածում շահագործել երկաթգծի տվյալ հատվածը: Այդ դեպքում ինչ-որ չափով կարելի էր խոսել ճանապարհների ապաշրջափակման մասին։ Իսկ Վրաստանի տարածքով փոխադրումը հանգեցնում է լրացուցիչ ծախսերի։

Հիշեցնենք, որ նոյեմբերի 8-ին Հայաստան է հասել ղազախական ցորեն փոխադրող գնացքը ՝ անցնելով Ղազախստանի , Ռուսաստանի, Ադրբեջանի և Վրաստանի տարածքով: Բերվել է մոտ 1000 տոննա չորրորդ կարգի ցորեն։ Հայաստանին ցորենի մատակարարումը հնարավոր է դարձել Ադրբեջանի կողմից բեռնափոխադրումների սահմանափակումների վերացման շնորհիվ, ինչը նպաստում է տարածաշրջանային հաղորդակցությունների վերականգնմանը և տնտեսական համագործակցության խթանմանը՝ Վաշինգտոնում ձեռք բերված պայմանավորվածությունների համատեքստում: Օրերս Ադրբեջանի և Վրաստանի տարածքով երկաթուղային տրանսպորտով Հայաստան է բերվել նաև ցորեն Ռուսաստանի Դաշնությունից: