Արմինֆո.Հայաստան-ԵՄ գործընկերությունն օրեցօր բարելավվում է, այսօր ընդունվել է Գործընկերության նոր ռազմավարություն։ Այդ մասին հայտարարել է ԵՄ արտաքին գործերի և անվտանգության քաղաքականության հարցերով բարձր ներկայացուցիչ Կայա Կալլասը՝ Հայաստան-ԵՄ Գործընկերության խորհրդի 6-րդ նիստի ավարտին հրավիրված մամուլի ասուլիսի ժամանակ։
Նրա խոսքով՝ այս նոր հավակնոտ օրակարգը միտված է մի շարք ուղղություններով համագործակցության ընդլայնմանը, այդ թվում ՝ Հայաստանի տնտեսության և անվտանգության ոլորտի դիվերսիֆիկացմանը:
Նա նաև հաղորդել է, որ դեկտեմբերին կկայանա ԵՄ արտգործնախարարների հանդիպումը ։ "Պարոն Միրզոյանին հրավիրում եմ այդ հանդիպմանը, որտեղ կքննարկվեն Հայաստանի կայունության ամրապնդմանն ու ընտրություններին առնչվող հարցեր", - հավելել է եվրապաշտոնյան:
Միևնույն ժամանակ, Կալլասը նշել է, որ 2025 թվականը կարևոր էր ԵՄ-Հայաստան հարաբերությունների համար, և շատ կարևոր էին նաև Հայաստանի և Ադրբեջանի միջև համաձայնությունները՝ օգոստոսի 8-ին ձեռք բերված պայմանավորվածությունների արդյունքում, որոնցով ավարտվեց տասնամյակներ տևած հակամարտությունը: Նա նշել է, որ ԵՄ-ը կաջակցի Հայաստանին այդ հարցում։
"Այսօր ես հայտարարում եմ 15 միլիոն եվրոյի մասին, որը կուղղվի խաղաղությանը և Հայաստանի դիմադրողականության բարձրացմանը։ Կիրականացվեն մի շարք նախաձեռնություններ։ Իհարկե, Հայաստանի առջև կանգնած են նաև այլ մարտահրավերներ։ Խորհրդարանական ընտրությունների նախաշեմին Ռուսաստանն ու նրա պրոքսիներն ապատեղեկատվական գրոհներ են իրականացնում Հայաստանի դեմ։ Մենք տեսնում ենք նույն ցանցերը, որոնք շատ ակտիվ օգտագործվել են Մոլդովայում, նույն սցենարը: ԵՄ ֆինանսավորումը կօգնի բացահայտել եւ հակազդել արտաքին ազդեցություններին", - ասել է Կալլասը, հավելելով, որ Հայաստանը միայնակ չէ արտաքին մարտահրավերների առջեւ, եւ ԵՄ-ը կանգնած է նրա կողքին՝ դրանց հակազդելու հարցում:
Իր հերթին՝ ՀՀ ԱԳ նախարար Արարատ Միրզոյանը համոզմունք է հայտնել, որ Հայաստան-ԵՄ գործընկերությունն էլ ավելի կամրապնդի Հայաստանի կայունությունը, այդ թվում ՝ հիբրիդային սպառնալիքների պայմաններում: Նա նաև թվարկել է այն ուղղությունները, որոնցում կողմերը սերտորեն համագործակցում են՝ սկսած մուտքի արտոնագրային ռեժիմի ազատականացման գործընթացի մեկնարկից մինչև անվտանգության ոլորտում փոխգործակցություն:
