Երկրորդ վարկը՝ մեկ օրում. Հայաստանը մտադիր է 100 մլն եվրոյի վարկային գիծ ստանալ ԶՖԳ-ից

Արմինֆո. Հայաստանի կառավարությունը նախատեսում է 100 մլն եվրոյի վարկային գիծ ստանալ Զարգացման ֆրանսիական գործակալությունից (ԶՖԳ)՝ ջրային տնտեսության և գյուղատնտեսության զարգացման համար: Եվս 12,4 մլն եվրո կստանա ԵՄ-ից՝ դրամաշնորհի տեսքով։ ՀՀ և ԶՖԳ միջև չհաստատված վարկային գծի տրամադրման վերաբերյալ թիվ CAM 1029 շրջանակային համաձայնագրի ստորագրման առաջարկությանը ՀՀ կառավարությունը հավանություն է տվել դեկտեմբերի 4-ին կայացած հերթական նիստում: Նշենք, որ այսօր իշխանությունները փոփոխություն են կատարել ԶՖԳ հետ 150 մլն եվրոյի մեկ այլ վարկային համաձայնագրում ՝ արդեն ընթացիկ ֆինանսական տարում միջոցներ ստանալու համար:

Ինչպես ասվում է փաստաթղթի հիմնավորման մեջ, շրջանակային համաձայնագրի  ստորագրումը նախաաատեսվում է «Հայաստանի ջրային և գյուղատնտեսության ոլորտների համապարփակ զարգացում» ծրագրի շրջանակում։

Նշվում է, որ Հայաստանում ջրային և ոռոգման ենթակառուցվածքները կրում են զգալի մաշվածություն, ջրի կորուստները և ոչ արդյունավետ կառավարումը խոչընդոտում են ոլորտի արտադրողականությանը, իսկ կլիմայական փոփոխությունները մեծացնում չոր տարիների առաջացման ռիսկը։ WAIDA-ն առաջարկում է համալիր լուծում՝ միաժամանակ Ծրագրի երկու պիլարներով՝ ազգային մակարդակում իրականացվող ջրային ենթակառուցվածքների ներդրումային բաղադրիչ, որը համաֆինանսավորելու է Համաշխարհային բանկի «Ջրային և ոռոգման ծառայությունների բարելավում» (WISE) ծրագիրը; ՀՀ Սյունիքի մարզում տեղական մակարդակում իրականացվող բաղադրիչ՝ ուղղված ոռոգման համակարգերի վերականգնմանը, ջրային ռեսուրսների կառավարման բարելավմանը և կայուն ու ընդգրկուն գյուղատնտեսության զարգացմանը:

Հատուկ կարևորություն ունի Սյունիքի մարզում բաղադրիչի իրականացումը, որը հնարավորություն կտա համատեղել ենթակառուցվածքների զարգացումը տեղային տնտեսական և գյուղատնտեսական ներուժի լիարժեք օգտագործման հետ, որի շրջանակներում նախատեսվում է իրականացնել` Սիսիան, Գորիս և Մեղրի համայնքների ոռոգման համակարգերի վերականգնում և արդիականացում փուլային եղանակով` ինքնահոս համակարգեր, պոմպակայաններ, ջրի կրկնակի օգտագործման համակարգեր; խորհրդատվական ծառայություններ (ուսումնասիրություններ, մանրամասն նախագծեր, հսկողություն):

Ծրագիրը հիմնվելու է 4 հիմնական բաղադրիչների վրա՝ տրամաբանական և փոխկապակցված հետևյալ հաջորդականությամբ` ներդրումներ ջրային ենթակառուցվածքների արդիականացման, վերականգնման և ոռոգման համակարգերի բարելավման ոլորտում; ներդրումներ ավելի զարգացած գյուղատնտեսություն ունենալու համար;   ներդրումներ ագրոբիզնեսի բնագավառում, ներառյալ` ագրոզբոսաշրջությունը, որի նպատակն է ավելի մեծ արժեք հաղորդել արտադրանքին, որը կայուն գյուղատնտեսության նախապայման է; կանաչ և խելացի գյուղատնտեսության աճի զարգացման համար առաջադեմ ֆինանսական մեխանիզմների մշակում` առանցքային ուշադրություն դարձնելով թվայնացմանը։

ԶՖԳ-ի ֆինանսավորումը կազմված է առավելագույնը 100 միլիոն եվրո բազմատրանշ վարկային գծից՝ երեք տրանշով, ՀՀ Սյունիքի մարզի ֆինանսավորման վարկը՝ 30 մլն եվրո; Ջրային և ոռոգման ծառայությունների բարելավման ծրագրի/WISE ֆինանսավորման վարկի առաջին մասնաբաժինը՝ առավելագույնը 30 մլն եվրո; Ջրային և ոռոգման ծառայությունների բարելավման ծրագրի/WISE ֆինանսավորման վարկի երկրորդ մասնաբաժինը՝ առավելագույնը 40 մլն եվրո; Ջրային և ոռոգման ծառայությունների բարելավման ծրագրի/WISE համաֆինանսավորողը Համաշխարհային բանկն է:

Առաջին 2 տրանշների (յուրաքանչյուրը 30 միլիոն եվրո) վարկային գծի հաստատումները նախատեսվում են մինչև 2025 թվականի դեկտեմբերի 20-ը։ Տեխնիկական աջակցություն տրամադրելու նպատակով ԵՄ կողմից նախատեսվում է նաև 12.456 մլն եվրո դրամաշնորհ: