Արմինֆո. Վրաստանի վարչապետ Իրակլի Կոբախիձեի որոշմամբ՝ ադրբեջանական վառելիքի մեկանգամյա երկաթուղային փոխադրումը Հայաստան կիրականացվի բոլորովին անվճար, հաղորդում է վրացական Առաջին ալիքը ՝ հղում անելով երկրի Էկոնոմիկայի նախարարությանը:
Այդպիսով Վրաստանի Էկոնոմիկայի եւ կայուն զարգացման նախարարությունը պատասխանում է ադրբեջանական ԶԼՄ-ներում տարածված այն տեղեկատվությանը, թե, իբր, "Ադրբեջանից Հայաստան երկաթուղով վառելիքի մատակարարմանը խանգարում են սակագնային արգելքները":
«Ընթացիկ տարվա դեկտեմբերի 5-ին Վրաստանի կառավարությունը գործընկեր երկրներից ստացել է Վրաստանի տարածքով Ադրբեջանից Հայաստան վառելիքի մեկանգամյա տարանցման խնդրանք:
Վրաստանի վարչապետ Իրակլի Կոբախիձեի որոշմամբ վրացական երկաթուղուն անհապաղ հանձնարարվել է այդ բեռի փոխադրումն իրականացնել երկաթուղով՝ մեկ անգամ և բոոլորովին անվճար: Որոշման մասին տեղեկացվել են պաշտոնական կողմերը:
Վրաստանը եղել և մնում է ինչպես Հայաստանի, այնպես էլ Ադրբեջանի ռազմավարական և հուսալի գործընկերը։ Մենք միշտ եղել և մնում ենք տարածաշրջանում խաղաղության և համագործակցության կողմնակից", - նշում են Վրաստանի էկոնոմիկայի նախարարությունում։
