Արմինֆո.Հայաստանի ՊԵԿ նախագահ Էդուարդ Հակոբյանը հյուրընկալել է ԱՄՆ Պետքարտուղարության Արտահանման հսկողության և սահմանային անվտանգության (EXBS) ծրագրի տարածաշրջանային խորհրդատու Քերն Չեյսնին և ՀՀ-ում ԱՄՆ դեսպանության Թմրամիջոցների դեմ պայքարի և իրավապահ համագործակցության գրասենյակի (INL) տնօրեն Զաքարի Բարտերին։
Ինչպես Հաղորդել է Հակոբյանը սոցցանցում, հանդիպմանը կարևորել է ամերիկյան գործընկերների մշտական աջակցությունը, որը նպաստում է սահմանային մաքսային հսկողության ենթակառուցվածքների կատարելագործմանը, ինչպես նաև մաքսային ծառայողների կարողությունների շարունակական զարգացմանը։
«Քննարկել ենք ԱՄՆ-ի կողմից տրամադրվող աջակցության ծրագրի ընթացքը՝ մաքսային ռիսկերի կատարելագործման ուղղությամբ, ինչը կարևոր է մաքսային ռիսկերի կառավարման համակարգի բարելավման համար, այդ թվում՝ վերլուծական կարողությունների բարձրացման տեսանկյունից։
Անդրադարձ ենք կատարել նաև Թմրամիջոցների դեմ պայքարի և իրավապահ համագործակցության գրասենյակի հետ համագործակցությանը՝ կարևորելով մաքսային ծառայողների համար կազմակերպվող դասընթացներն ու տրամադրվող սարքավորումները, որոնք թույլ են տալիս առավել արդյունավետ պայքարել մաքսանենգության դեմ», - գրել է ՊԵԿ նախագահը։
