Արմինֆո. Կորեայի ձոր տանող ճանապարհի հիմնանորոգումն ավարտվել է։ Այդ մասին հաղորդում է Տարածքային կառավարման և ենթակառուցվածքների նախարարության լրատվական ծառայությունը՝ անդրադառնալով ՏԿԵ նախարար Դավիթ Խուդաթյանի գլխավորած պատվիրակության Կոտայք այցի արդյունքներին։
Այդ հատվածում աշխատանքները մեկնարկել են օգոստոսի 18-ին, ծրագրի պայմանագրային արժեքը կազմում է 276 մլն դրամ: Այս պահին աշխատանքներ են տարվում ճանապարհային անվտանգության տարրերի տեղադրման ուղղությամբ։
«Այդ ճանապարհը շատ կարևոր նշանակություն ունի, հատկապես, քաղաքը շրջանցելու և խցանումներից բեռնաթափելու համար: Այդ հատվածում մեծ ծավալի աշխատանքներ են կատարվել, ճանապարհն ընդլայնվել և բարեկարգվել", - ասվում է գերատեսչության հաղորդագրության մեջ։
Այնուհետև պատվիրակությունն այցելել է Երևան-Աշտարակ մայրուղու Պռոշյան բնակավայր տանող հատված: Նշվել է, որ այնտեղ կատարվել են 5,02 կմ երկարությամբ հատվածի վերանորոգման աշխատանքներ: Պայմանագրային արժեքը կազմել է շուրջ 269 մլն դրամ, իսկ աշխատանքներն ավարտվել են 95% - ով:
