Արմինֆո.Հայաստանում արևային էներգետիկայի զարգացմանն ավելի մեծ ուշադրություն կդարձվի։ Այդ մասին Համբուրգում լրագրողներին հայտարարել է ՀՀ վարչապետ Նիկոլ Փաշինյանը։
Նրա ասելով՝ այդ ոլորտը վերջին շրջանում երկրում շատ լուրջ զարգացում է ապրում։ Արևային էներգետիկայի օբյեկտների արտադրած էլեկտրաէներգիայի ծավալներն արդեն երեք անգամ գերազանցում են Հայկական ԱԷԿ-ի ծավալները։ Բայց հիմա, ինչպես նշել է Փաշինյանը, շատ կարևոր է կուտակման խնդիրը լուծել էլեկտրաէներգիայի պահեստարանների ստեղծման միջոցով։ Այս խնդրի լուծումը հսկայական հեռանկարներ կբացի պետության էներգետիկ անվտանգության համար։ Այս համատեքստում Փաշինյանը կարևորել է գերմանական ընկերությունների հետ համագործակցությունը։
"Մենք տեսնում ենք համագործակցության հսկայական ներուժ այնպիսի ոլորտներում, որոնք նախկինում չեն եղել։ Մասնավորապես, Համբուրգում մեծ հետաքրքրություն է նկատվում «կանաչ» ջրածնի նկատմամբ։ Արեւային էլեկտրաէներգիան օգտագործվում է ջրածնի արտադրության համար, որն, իր հերթին, օգտագործվում է որպես վառելիք։ Եվրամիությունը նախատեսում է նաեւ հաղորդակցություններ ստեղծել Կենտրոնական Ասիա եւ Հարավային Կովկաս «կանաչ» ջրածնի արտահանման կամ ներմուծման համար: Այցի արդյունքներից հասկացանք, որ այս ոլորտին պետք է մեծ ուշադրություն դարձնել։ Լավ նորությունն այն է, որ անցյալ տարի, գուցե և մի փոքր ավելի վաղ, իմ որոշմամբ ստեղծվել էր աշխատանքային խումբ՝ «կանաչ» ջրածնի արտադրության հարցերը ուսումնասիրելու համար։ Իմ նախորդ այցից հետո պայմանավորվածություն է ձեռք բերվել համագործակցություն հաստատել գերմանական "Ֆիխտներ" ընկերության հետ», - նշել է Փաշինյանը։
Նշենք, որ ՀՀ կառավարությունը նախատեսում էր մինչև 2030 թվականը երկրի էներգահաշվեկշռում արևային էներգիայի տեսակարար կշիռը 0,3% - ից հասցնել 15% - ի, սակայն արդեն այսօր ակնհայտ է դարձել, որ այդ ցուցանիշը գերակատարվելու է: Երկիրն ունի արևային էներգիայի մեծ ներուժ. արևային էներգիայի ներհոսքի միջին տարեկան արժեքը հորիզոնական մակերեսի 1 քմ-ի համար կազմում է 1720 կՎտժ/քմ, իսկ հանրապետության տարածքի մեկ քառորդը' արևային էներգիայի պաշարներ' տարեկան առնվազն 1850 կՎտժ/ քմ ինտենսիվությամբ: Սակայն կուտակիչ կայանների բացակայությունը խոչընդոտում է երկրի էներգետիկայի այդ հատվածի զարգացմանը։
