ԱՄՆ-ում Հայաստանի դեսպանը մասնակցել է "Թրամփի երթուղուն" նվիրված USACC-ի կլոր սեղանին

Արմինֆո. Ամերիկա-ադրբեջանական առեւտրի պալատը (USACC) բարձր մակարդակի կլոր սեղան է անցկացրել՝ նվիրված "Թրամփի երթուղի՝ հանուն միջազգային խաղաղության եւ բարգավաճման" (TRIPP) նախաձեռնությանը ՝ ընդգծելով այդ նախաձեռնության դերը  որպես Կենտրոնական Եվրասիայում ԱՄՆ-ի վերսկսված ռազմավարական փոխգործակցության կենտրոնական հենասյուն:

Ինչպես հաղորդում է USACC-ի մամուլի ծառայությունը, փակ քննարկմանը մասնակցել են Հարավային Կովկասի եւ Կենտրոնական Ասիայի դեսպանները, ԱՄՆ կառավարության բարձրաստիճան ներկայացուցիչներ եւ մասնավոր հատվածի ղեկավարներ, որպեսզի ուսումնասիրեն, թե ինչպես TRIPP-ը կարող է արագացնել ենթակառուցվածքի զարգացումը, ամրապնդել տարածաշրջանային փոխկապակցվածությունը եւ ԱՄՆ-ի կայուն տնտեսական ներկայությունը Միջին միջանցքի երկայնքով:

"Ադրբեջանի և Հայաստանի միջև օգոստոսյան խաղաղության համաձայնագիրը, որը ձեռք է բերվել այս վարչակազմի աջակցությամբ, պատմական պահ է ստեղծել։ TRIPP-ն այն է, թե ինչպես ենք մենք կայուն դարձնում այս աշխարհը՝ տարանցիկ երթուղին վերածելով ընդհանուր բարգավաճման շարժիչի", - ասել է ԱՄՆ Պետդեպարտամենտի կառավարման տնօրեն և խաղաղապահ առաքելությունների հարցերով հատուկ բանագնաց Վինայ Չավլան: Նա հաավելել է, որ ամերիկյան ընկերությունները եւ կապիտալը կարեւոր դեր են խաղում այդ տեսլականում, եւ այս վարչակազմը լի է վճռականությամբ ապահովելու իրենց տեղը բանակցությունների սեղանի շուրջ»:

Մասնակիցներն ընդգծել են, որ TRIPP-ն իրենից ներկայացնում է տրանսպորտային կապի տարածաշրջանային նախաձեռնությունների նոր սերունդ, որոնք առանձնանում են պետական-մասնավոր կառուցվածքով, բիզնեսին կողմնորոշված մոտեցմամբ և երկարաժամկետ առևտրային կայունության վրա կենտրոնացմամբ: Հայաստանի, Ադրբեջանի, Վրաստանի, Ղազախստանի, Ղրղզստանի Հանրապետության, Թուրքմենստանի և Ուզբեկստանի դեսպաններն ու բարձրաստիճան դիվանագետները ներկայացրել են ազգային տեսակետներն առ այն, թե ինչպես TRIPP-ը կարող է լրացնել զարգացման ռազմավարությունները, բացահայտել անդրսահմանային սիներգիան և բարձրացնել տարածաշրջանային տարանցիկ երթուղիների մրցունակությունը:

"Օգոստոսյան գագաթնաժողովը պատմական դեր է խաղացել տարածաշրջանային խաղաղ գործընթացի առաջմղման գործում։ Փոխկապակցման և համագործակցության սկզբունքները վաղուց առաջ են մղվում Ադրբեջանի կողմից, որն արդեն ամուր գործընկերային հարաբերություններ է հաստատել Թուրքիայի, Վրաստանի և Կենտրոնական Ասիայի երկրների հետ՝ ամուր հիմք դնելով հետագա զարգացման համար: Այդ լիցքն իրական է, եւ մենք պետք է գործենք արագ։ TRIPP-ի՝ որպես Միջին միջանցքի առանցքային բաղադրիչի հաջողության ապահովումը կարևոր նշանակություն ունի", - ասել է ԱՄՆ-ում Ադրբեջանի դեսպան Խազար Իբրահիմը։ "Նախագահ Թրամփի առաջնորդության շնորհիվ մեզ հաջողվել է ստեղծել խաղաղության այդ ազդակը և TRIPP-ը դիրքավորել որպես մեր տարածաշրջանային ռազմավարության առանցքային տարր", - հայտարարել է ԱՄՆ-ում Հայաստանի դեսպան Նարեկ Մկրտչյանը:

Նա հավելել է, որ ԱՄՆ-ի մասնակցությունը կօգնի այդ նախաձեռնությունը վերածել շոշափելի օգուտների Հարավային Կովկասի, Կենտրոնական Ասիայի համար և նրա սահմաններից դուրս: "Ես ողջունում եմ մեր ադրբեջանցի գործընկերների հետ կառուցողական փոխգործակցությունը և այն փաստը, որ քննարկումներն այժմ ընթանում են զարգացման կոնկրետ նախագծերի ուղղությամբ։ Նման գործնական համագործակցությունն անհրաժեշտ է իրական տնտեսական և սոցիալական արդյունքների հասնելու համար", - ամփոփել է նա։

 Քննարկումների ընթացքում դիտարկվել է նաև ամերիկյան ինստիտուտների, այդ թվում ՝ ԱՄՆ միջազգային ֆինանսավորման զարգացման կորպորացիայի (DFC) դերը նախագծի ֆինանսավորմանն աջակցության, առևտրային ընթացակարգերի պարզեցման և ներդրումային ռիսկերի նվազեցման գործում:

Մասնավոր հատվածի մասնակիցները, ներառյալ Google-ը, Bechtel-ը և Tetra Tech-ը, ինչպես նաև տարածաշրջանային առևտրային ասոցիացիաները, կիսվել են ճյուղային տեսակետներով և ընդգծել ամերիկյան ընկերությունների աճող հետաքրքրությունը TRIPP-ի և դրան առնչվող տարածաշրջանային նախաձեռնությունների կողմից ընձեռվող առևտրի և ներդրումների հնարավորությունների նկատմամբ:

Կլոր սեղանն ավարտվել է ընդհանուր գնահատականով, որ TRIPP-ն առաջարկում է եզակի հարթակ ԱՄՆ ռազմավարական առաջնահերթությունները տարածաշրջանային տնտեսական ինտեգրման հետ համաձայնեցնելու համար ՝ Հարավային Կովկասի և Կենտրոնական Ասիայի համար ապահովելով լայնածավալ և առևտրային առումով կենսունակ կապի մոդել: USACC-ը վերահաստատել է իր հանձնառությունը կառավարությունների, ԱՄՆ գերատեսչությունների և մասնավոր հատվածի միջև երկխոսություն զարգացմանը՝ աջակցելու TRIPP-ի հաջող իրականացմանը և դրա երկարաժամկետ ազդեցությանը: