"Լույս" հիմնադրամ. Հայաստանում տնտեսական ակտիվության աճը պայմանավորված է անկայուն գործոններով

Արմինֆո.  Հայաստանում տնտեսական ակտիվության աճը պայմանավորված է անկայուն գործոններով։ Այդ մասին է վկայում "Լույս" հիմնադրամի ՝ 2025 թվականի հունվար-նոյեմբեր ամիսներին Հայաստանի տնտեսության սոցիալ-տնտեսական զարգացման վերլուծությունը։

ԱրմԻնֆո-ին տրամադրված հիմնադրամի վերլուծության մեջ նշվում է, որ վերջին ամիսներին Հայաստանում պահպանվում է տնտեսական ակտիվության աճի բարձր տեմպը: Հավելվում է, որ ընթացիկ տարվա նոյեմբերին ՀՆԱ-ի աճի տեմպը կազմել է 10,4 տոկոս, իսկ հունվար-նոյեմբեր ամիսների կուտակային ինդեքսը՝ 8,3 տոկոս ՝ նախորդ ամսվա համապատասխան ցուցանիշի համեմատ արագանալով 0,2 տոկոսային կետով: Սակայն ՀՆԱ-ի աճ ապահովող երկու կարևոր գործոնները՝ շինարարության աճի բարձր տեմպը և արդյունաբերության վերականգնումը, հիմնված են անկայուն գործընթացների վրա։

"Արդյունաբերության աճի տեմպերն արագանում են, թեեւ դրանց հիմքում ընկած գործոններն անկայուն են ։ Արդյունաբերական հատվածը սկսել է արագ վերականգնվել, և արդեն արձանագրվում են աճի դրական ցուցանիշներ։ Սակայն վերջին ամիսների աճը, հիմնականում, պայմանավորված է վերամշակող արդյունաբերության "գունավոր մետաղների արտադրություն" ենթաճյուղի աճով, որն ընթացիկ տարվա հոկտեմբերին մշակող արդյունաբերության 20.8 տոկոս աճից ապահովել է 18.4 տոկոսային կետ: Վերջինս հիմնականում կապված է ոսկու և այլ մետաղների վերաարտահանման հետ", - կարծում են հիմնադրամի վերլուծաբանները:

Միաժամանակ արձանագրվում է, որ տնտեսության արտահանման ոլորտում դրական միտումները դեռևս շատ աննշան են։ Հիմնադրամում ընդգծում են, որ թեև արտահանման և ներմուծման ցուցանիշներն արդեն դրական են դարձել և կտրուկ արագացել են, դրանք դեռևս բավարար չեն արտաքին առևտրի վերականգնման և առողջ աճի մասին խոսելու համար: Մասնավորապես, եթե արտահանման աճը սրագրենք, հաշվի առնելով "թանկարժեք և կիսաթանկարժեք քարեր, թանկարժեք մետաղներ և դրանցից պատրաստված իրեր" ապրանքային խմբի ներդրումը (չեզոքացնելով վերաարտահանման ազդեցության զգալի մասը), ապա աճը կկազմի ընդամենը 2,2 տոկոս:

"Ներմուծման սրբագրված ծավալը նույնպես ցույց է տալիս համանման ցածր աճ՝ 3,6 տոկոս։ Այս ցուցանիշները բավականին ցածր են և վկայում են ոլորտում զգալի դրական միտումների բացակայության մասին", - ասվում է հիմնադրամի վերլուծության մեջ։