Արմինֆո. Ակնհայտ է, որ հայ-թուրքական սահմանի տարբեր հատվածներում պետք է կամուրջներ կառուցվեն։ Այդ մասին հայտարարել է վարչապետ Նիկոլ Փաշինյանը՝ «Հայաստանը և խաղաղությունը ռիսկերի ու հնարավորությունների խաչմերուկում» խորագրով լիագումար քննարկման ընթացքում, որը տեղի է ունեցել Միջազգային և անվտանգության հարցերի հայկական ինստիտուտի XV անվտանգային ֆորումի շրջանակում:
"Առնվազն, կամուրջ պետք է կառուցվի "Մարգարա" սահմանային անցակետի մոտ (Արմավիրի մարզում), կամուրջ պետք է կառուցվի "Ախուրիկ" սահմանային անցակետի մոտ (Շիրակի մարզում), այնտեղ պետք է կառուցվեն նաեւ մաքսային և սահմանային տերմինալներ, ինչպես նաև՝ Երասխի (Նախիջևանի հետ սահման) մոտ: Մեծ է որոշակի զարգացումների հավանականությունը Իջևան-Ղազախ հատվածում (Ադրբեջանի հետ սահմանի հյուսիս-արևելյան հատված), ինչպես նաև՝ հարավում», - ասել է Փաշինյանը։
Նրա խոսքով՝ դեռ պետք է հասկանալ, թե որ հատվածում է Հայաստանը աշխատելու ԹՐԻՓՓ- ի հետ, որ հատվածում ՝ այլ գործընկերների հետ։
Ամենայն հավանականությամբ, ինչպես շարունակել է նա, Հայաստանը կսկսի էլեկտրահաղորդման գծերի արդիականացման նախագծերի իրականացումը, եւ՝ ոչ միայն հայ-թուրքական սահմանին ։ Արդեն կան համապատասխան ազդակներ մասնավոր հատվածից, հավելել է վարչապետը։
Ընդհանուր առմամբ, Նիկոլ Փաշինյանի համոզմամբ, Հայաստանը աշխարհի ծայրին գտնվող երկրից վերածվում է աշխարհի բավական ակտիվ կետում գտնվող երկրի:
Կարգավորման գործընթացի մեկնարկի մասին 2021 թվականի դեկտեմբերի 13-ին հաղորդել էր Թուրքիայի այն ժամանակվա արտգործնախարար Մևլութ Չավուշօղլուն։ Ընդ որում, նա ընդգծել էր, որ Անկարան գործելու է Ադրբեջանի հետ համակարգմամբ՝ Հայաստանի հետ հարաբերությունների կարգավորմանն ուղղված քայլերի վերաբերյալ: Կողմերը կարգավորման գործընթացում Թուրքիայի եւ Հայաստանի հատուկ ներկայացուցիչներ են նշանակել ՝ Սերդար Քըլըչը եւ Ռուբեն Ռուբինյանը, որոնք արդեն մի քանի փուլ բանակցություններ են անցկացրել, սակայն ինչ-որ բեկումնային որոշումների հասնել նրանց դեռ չի հաջողվել:
