Արմինֆո. Հայաստանն ու Եվրամիությունը ստորագրել են տրանսպորտային ենթակառուցվածքների ոլորտում գործընկերության մասին համատեղ հռչակագիր: Փաստաթուղթը ստորագրվել է 2026 թվականի մայիսի 5-ին Երևանում կայացած Հայաստան-ԵՄ առաջին գագաթնաժողովի շրջանակում։
Հռչակագրում կողմերը վերահաստատում են տրանսպորտային ենթակառուցվածքների ոլորտում երկկողմ հարաբերությունների ամրապնդման և տարածաշրջանային համագործակցության ընդլայնման ընդհանուր տեսլականն ու հանձնառությունը:
Նշվում է, որ այդ գործընկերությունը, որը լիովին համապատասխանում է Տրանսպորտային ենթակառուցվածքի զարգացման ԵՄ գլոբալ ռազմավարությանը, Տրանսպորտային ենթակառուցվածքի ոլորտում միջտարածաշրջանային օրակարգին, "Խաղաղության խաչմերուկ" նախաձեռնությանը, TRIPP նախագծին եւ հիմնված է Սեւծովյան տարածաշրջանում ԵՄ ռազմավարական մոտեցման մասին համատեղ հաղորդագրության, ինչպես նաեւ երրորդ երկրների հետ ԵՄ համագործակցության հաստատված քաղաքականությունների եւ ձեւաչափերի վրա, արտացոլում է ներառական, անվտանգ եւ կայուն տրանսպորտային, էներգետիկ եւ թվային կապերի ամրապնդման ընդհանուր շահագրգռվածությունը:
Կողմերը այս հռչակագրով ճանաչում են հետեւյալ ուղղությունների ռազմավարական կարեւորությունը․ տրանսպորտ, էներգետիկա եւ թվային տեխնոլոգիաներ։
Տրանսպորտի ոլորտում փոխգործակցության շրջանակներում նշվում է տարածաշրջանային տրանսպորտային ցանցերում, ներառյալ Անդրկասպյան տրանսպորտային միջանցքում Հայաստանի ներառական ինտեգրման ընդլայնումը ՝ համաձայնեցված տեխնիկատնտեսական հիմնավորումների եւ համատեղ սահմանված առաջնահերթությունների տեխնիկական գնահատականների միջոցով։
Էներգետիկայի ոլորտում նշվում է աջակցությունը Հայաստանի ջանքերին՝ ուղղված էներգետիկ անկախության բարձրացմանը, կլիմայի փոփոխության նկատմամբ կայունությանը և էլեկտրացանցի դիվերսիֆիկացմանը, ամրապնդմանը, էներգիայի պահպանման հզորությունների ընդլայնմանը և տարածաշրջանային ինտեգրման խթանմանը:
"Այս նպատակներին աջակցելու համար երկու կողմերն առաջ են մղելու առաջնահերթ նախագծերն ու նախաձեռնությունները տեխնիկական համագործակցության, տեխնիկատնտեսական հիմնավորումների, միջազգային ֆինանսական հաստատությունների հետ համագործակցության և մասնավոր հատվածի մասնակցության միջոցով",- ասվում է հռչակագրում:
Նշվում է, որ սույն Հռչակագիրն արտացոլում է հավակնոտ, փոխշահավետ և հեռանկարային գործընկերություն զարգացնելու Հայաստանի Հանրապետության և Եվրոպական միության մտադրությունը՝ ճանապարհ հարթելով դեպի շոշափելի արդյունքներ, որոնք կամրապնդեն Հայաստանի ինտեգրումը եվրոպական տրանսպորտային, էներգետիկ և թվային ցանցերին և կնպաստեն տարածաշրջանային խաղաղությանը, կայունությանը և փոխկապակցվածությանը:
