ԱրմԻնֆո. ՀՀ տարածքային կառավարման և ենթակառուցվածքների նախարար Դավիթ Խուդաթյանը կմասնակցի Բաթումիում կայանալիք Միջազգային ծովային ֆորումին: Նախարարին գործուղելու որոշումը ստորագրել է ՀՀ վարչապետ Նիկոլ Փաշինյանը:
Կառավարության մամուլի ծառայության տվյալներով՝ Խուդաթյանը Վրաստանում կլինի սեպտեմբերի 6-7-ը:
Առաջիկա միջոցառումը ուշագրավ է այն պարզ պատճառով, որ այնտեղ կքննարկվի Միջին միջանցքի նախագիծը:
Վրացական միջազգային ծովային ֆորումը (GIMF 2026) կանցկացվի Բաթումիում սեպտեմբերի 7-8-ը: Ծովային տրանսպորտի գործակալության տվյալներով՝ միջոցառումը կանցկացվի Վրաստանի վարչապետի հովանու ներքո, էկոնոմիկայի և կայուն զարգացման նախարարության աջակցությամբ և Ծովային տրանսպորտի գործակալության կազմակերպչական աջակցությամբ: GIMF 2026-ը մեծ նշանակություն ունեցող միջազգային միջոցառում է, որը կամրապնդի Վրաստանի կարգավիճակը որպես ծովային պետություն: Միջոցառման նպատակն է ցուցադրել Միջին միջանցքի զարգացման ներուժը և ամրապնդել տարածաշրջանային տրանսպորտային կապերը համաշխարհային մասշտաբով: Միջոցառմանը կմասնակցեն մոտ 40 երկրներից մինչև 400 պատվիրակներ: GIMF 2026-ը կհավաքի տարբեր երկրների նախարարների և բարձրաստիճան պաշտոնյաների, այդ թվում՝ ծովային վարչակազմերի ղեկավարների, ինչպես նաև լոգիստիկ հարցերով զբաղվող միջազգային կազմակերպությունների գլխավոր քարտուղարների, միջազգային ֆինանսական հաստատությունների, մասնավոր հատվածի և ակադեմիական շրջանակների ներկայացուցիչների: Գործակալության տվյալներով՝ Վրաստանի միջազգային ծովային ֆորումը անցկացվում է 2016 թվականից: Այս տարի ֆորումը հատուկ ուշադրություն կդարձնի այնպիսի առաջնահերթ ոլորտների, ինչպիսիք են Միջին միջանցքի զարգացման հնարավորությունները, տարածաշրջանային տրանսպորտային և լոգիստիկ կապը, նորարարությունը, կայուն ծովային տրանսպորտը, պետական-մասնավոր գործընկերության ամրապնդումը և այլն:
