ԱրմԻնֆո. Եվրոպական ներդրումային բանկը Հայաստանին կաջակցի ճանապարհային երթևեկության անվտանգության և թվայնացման ծրագրի նախապատրաստման հարցում։ ՀՀ կառավարությունը սեպտեմբերի 11-ի նիստում հավանություն տվեց ԵՆԲ-ի և ՀՀ տարածքային կառավարման և ենթակառուցվածքների նախարարության միջև համապատասխան համաձայնագրի ստորագրմանը։
Որոշման նախագծի հիմնավորման մեջ ընդգծվում է, որ 2025 թվականին անցկացված քննարկումների արդյունքում ձեռք է բերվել համաձայնություն Հայաստանում ճանապարհային երթևեկության անվտանգության և թվայնացման ծրագրի նախապատրաստման, ինչպես նաև ճանապարհային ցանցի անվտանգության գնահատման համակարգի ներդրման գործում համագործակցության վերաբերյալ։ Համաձայնագրի համաձայն՝ ԵՆԲ-ն, որպես տեխնիկական աջակցություն, կիրականացնի խորհրդատվական ծառայությունների ձեռքբերման ընթացակարգ և կստորագրի համապատասխան համաձայնագիր՝ ճանապարհային երթևեկության անվտանգության և թվայնացման ծրագրի իրականացմանն աջակցելու նպատակով խորհրդատվական ծառայությունների մատուցման վերաբերյալ։ Միևնույն ժամանակ, խորհրդատուի ծառայություններն ուղղված կլինեն ճանապարհային երթևեկության անվտանգության կառավարման կատարելագործմանը, ճանապարհային երթևեկության անվտանգության աուդիտի համակարգերի մշակմանը և վթարավտանգ հատվածների (վթարների բարձր մակարդակ ունեցող հատվածների) կառավարման մեխանիզմների ստեղծմանը։
Խորհրդատվական աջակցության շրջանակներում կտրամադրվեն ընդհանուր առաջարկություններ ծրագրի մշակման տեխնիկական գործընթացի վերաբերյալ, աջակցություն՝ ֆինանսավորման ներգրավման, խորհրդատվական ծառայությունների ձեռքբերման և պայմանագրերի կառավարման գործընթացներում, ընտրված խորհրդատուների կողմից ներկայացված փաստաթղթերի/հաշվետվությունների ուսումնասիրություն և դրանց վերաբերյալ մեկնաբանությունների տրամադրում, ինչպես նաև ծրագրի նախապատրաստման առանձին ասպեկտների վերաբերյալ մեթոդական ցուցումների մշակում։ Համաձայնագիրը Հայաստանի համար որևէ գույքային կամ ֆինանսական պարտավորություն չի ստեղծում, քանի որ խորհրդատվական ծառայությունների մատուցման պայմանագիրը կնքում է ԵՆԲ-ն, իսկ պայմանագրով նախատեսված վճարումները կատարում է Բանկը։
