Արմինֆո. ՀՀ ֆինանսների փոխնախարար Էդգար Մկրտչյանը մասնակցել է Եվրասիական կայունացման և զարգացման հիմնադրամի ռազմավարական հանդիպմանը: Քննարկվել են հիմնադրամի 2022-2026 թվականների կատարողականը և հաջորդ հինգ տարիների առաջնահերթությունները, ասվում է ՀՀ ֆինանսների նախարարության մամուլի ծառայության հաղորդագրության մեջ:
Աղբյուրի փոխանցմամբ՝ նոր ռազմավարության շրջանակներում հիմնադրամը նախատեսում է ավելի մեծ ուշադրություն դարձնել անդամ երկրների երկարաժամկետ տնտեսական կայունությանը: Նախատեսվում է 1.5 միլիարդ դոլար հատկացնել էներգետիկայի, ջրային և տրանսպորտի ոլորտներում ներդրումային ծրագրերի համար:
Նշենք, որ EFSD-ի ներկայիս նախագծերի պորտֆելը Հայաստանում կազմում է մոտավորապես 538 միլիոն դոլար, այդ թվում՝ 10 գործող ծրագիր: ՀՀ պետական բյուջեից EFSD ծրագրերի համար հատկացվել է 37.2 միլիարդ դրամ: Հիմնադրամը Հայաստանի տնտեսական աճը տարվա համար գնահատում է 5.5%: EFSD-ն նախատեսում է Հայաստանում բացել պաշտոնական մշտական գրասենյակ՝ նախագծերը համակարգելու համար:
