ԱրմԻնֆոՀայաստանի բարձր տեխնոլոգիական արդյունաբերության և արհեստական բանականության նախարարների տեղակալներ Գևորգ Մանտաշյանն ու Տաթև Ասլանյանն ընդունել են պատվիրակությանը՝ Հայաստանում Միգրացիայի միջազգային կազմակերպության (ՄՄԿ) ներկայացուցչության ղեկավար Իլոնա Տեր-Մինասյանի գլխավորությամբ։
Ինչպես հայտնում է գերատեսչության մամուլի ծառայությունը, հանդիպումը նվիրված էր Հայաստանում միգրացիոն տվյալների կառավարման համակարգի զարգացման և արդիականացման, դրա՝ Եվրոպական միության և այլ միջազգային չափանիշներին համապատասխանության, ինչպես նաև տվյալների կառավարման քաղաքականության գործընթացներում ժամանակակից տեխնոլոգիաների և արհեստական բանականության (ԱԲ) կիրառման հնարավորություններին։
Քննարկվել են Հայաստանի "Հանրային տեղեկատվության մասին" օրենքից բխող նորմատիվ իրավական ակտերը, ինչպես նաև այս ոլորտում առկա իրավական, ինստիտուցիոնալ և տեխնիկական բացերը, պետական մարմինների միջև տվյալների համատեղելիության ապահովման, տեղեկատվական համակարգերի ինտեգրման և տվյալների որակի բարձրացման հնարավոր քայլերը։
Հանդիպումը տեղի է ունեցել "Հայաստանում միգրացիոն տվյալների ամրապնդում: աջակցություն միգրացիայի վերաբերյալ Համաշխարհային պայմանագրի նպատակների իրագործման առաջընթացին" նախագծի շրջանակում, որն իրականացվում է ՄՄԿ-ի կողմից և ֆինանսավորվում է ՄՄԿ-ի զարգացման հիմնադրամի կողմից։
