Արմինֆո. Արմսվիսբանկի 2 մլրդ.դրամ ծավալով անվանական արժեկտրոնային դրամային պարտատոմսերի առաջնային տեղաբաշխումը հաջողությամբ ավարտվել է հուլիսի 10-ին, նախատեսված ժամկետից 4 օր շուտ: Տեղաբաշխված պարտատոմսերը ձեռք են բերել ինչպես տեղական, այնպես էլ օտարերկրյա իրավաբանական անձինք, այդ թվում`հայկական բանկերի և մասնավոր ներդրողներ:
Ինչպես ԱրմԻնֆո գործակալությանը տեղեկացվել է Բանկի մամլո-ծառայությունից, հուլիսի 14-ից հետո Բանկը ՆԱՍԴԱՔ ՕԷՄԷՔՍ Արմենիա ֆոնդային բորսա կներկայացնի ցուցակման հայտը: Երկրորդային շուկայում նշված պարտատոմսերի մարկետ-մեյքերն են` Ամերիաբանկը և ԱՐԱՐԱՏԲԱՆԿ-ը: Պարտատոսմերի շրջանառության ժամկետը սահմանվել է 4 տարի, արժեկտրոնային եկամտաբերությունը`12.75%: Արժեկտրոնային վճարումներ, ինչպես և նախորդ թողարկումներում, կատարվում են եռամսյակային կտրվածքով:
Արմսվիսբանկի դրամային պարտատոմսերի տեղաբաշխումը, ինչպես և դոլարայինի պարագայում, հաջող էր, քանի որ 2 մլրդ ծավալով պարտատոմսերի ձեռքբերման հայտը ներկայացվեց բաց բաժանորդագրության մեկնարկից հետո, առաջին ժամվա ընթացքում: Արմսվիսբանկի պարտատոմսերի բարձր պահանջարկի մասին է վկայում այն փաստը, որ բաց բաժանորդագրության առաջին օրը (15 հունիսի) հաջողվեց տեղաբաշխել թողարկման ավելի քան 30% -ը:
Ներկայումս ՆԱՍԴԱՔ ՕԷՄԷՔՍ Արմենիա բորսայում շրջանառվում են Արմսվիսբանկի արժեկտրոնային երեք դոլարային թողարկումները: Երեք տրանշները թողարկել են 2015-ի փետրվարի 13-ին, բայց առաջին երկուսը ցուցակման թերթիկում ներառվել են 2015-ի մայիսի 5-ին, իսկ երրորդը`մայիս 13-ին: Առաջին դոլարային տրանշի ծավալը կազմել է 2 մլն դոլար, երկրորդը`3 մլն.դոլար, երրորդը`5 մլն.դոլար: Առաջինի շրջանառության ժամկետը կազմում է 3 տարի, երկրորդինը`4, երրորդինը`5 տարի: Առաջին տրանշի եկամտաբերությունը կազմում է 7.5%, իսկ երկրորդինը`8%, երրորդինը` 8.5%, արժեկտրոնի տոկոսների եռամսյակային վճարումով: Երեք տրանշերն էլ շրջանառվում են «Bbond» ցուցակում: ԸՆդհանուր առմամբ, 2017-ի հունիսի 19-ի դրությամբ ՆԱՍԴԱՔ ՕԷՄԷՔՍ Արմենիա բորսայում շրջանառվում են կորպորատիվ պարտատոմսերի 11 թողարկողների 32 թողարկումներ: Դրանցից 20-ը (այդ թվում`16 դոլարային) կատարել են 7 թողարկող բանկեր`Արարատբանկը, Ամերիաբանկը, Արմսվիսբանկը, Հայբիզնեսբանկը, Անելիք Բանկը, Յունիբանկը և Կոնվերս Բանկը:
Հիշեցնենք, որ «Արմսվիսբանկը» հիմնադրվել 2004 թվականի հոկտեմբերի 7-ին Վարդան Սիրմակեսի կողմից, ով հանդիսանում է նաև շվեյցարական հայտնի Franck Muller Watchland ժամացույցների գործարանի հիմնադիրը, սեփականատերը և գլխավոր գործադիր տնօրենը, որի ներկայացուցչությունը գործում է Հայաստանում: Արմսվիսբանկը Հայաստանի առաջատար բանկերից է`արժեթղթերի թողարկման, մարկետմեյքերի և դեպոզիտար ծառայությունների տրամադրման գծով, ինչպես նաև հանդիսանում է արժեթղթերի առաջնային և երկրորդային շուկայի ակտիվ մասնակից: 2006 թվականից Բանկը հանդես է գալիս Կառավարության գործակալը` պետական պարտատոմսերի առաջնային շուկայում: 2016 թվականի մարտի 10-ի դրությամբ Բանկի բաժնետոմսերի 80%-ը պատկանում է HVS Holding" LLC ընկերութանը, որը կառավարվում է Վարդան Սիրմակեսի կողմից և գրանցված է Լյուքսեմբուրգում, իսկ մնացած 20% -ը 2013 թվականի վերջից պատկանում է Վարդան Սիրմակեսի կողմից վերահսկվող` «BELEGINGSMACHEPIJ JONGO» ընկերությանը, որը գրանցված է Նիդերլանդներում: