Ուրբաթ, 25 Սեպտեմբերի 2020 20:19

Արմինֆո.Ծովի մակերևույթից 2851 մետր բարձրության վրա ' Թեղենիս լեռան գագաթին, որտեղից սքանչելի տեսարան է բացվում  դեպի բիբլիական Արարատ լեռը, Սևանա լիճը, Արայի լեռը, Գեղամա լեռնաշղթան և Արագած լեռան 4 գագաթները, ԱՐԱՐԱՏԲԱՆԿ-ը հայտարարել է ռեբրենդինգի մասին, որն ազդարարել է նոր պատմական փուլի սկիզբը ինչպես բանկի, այնպես էլ Հայաստանի ողջ բանկային համակարգի համար:

 

Ռեբրենդինգի կարգախոսն է դարձել "Բարձրանում ենք միասին" արտահայտությունը, որը, վարչության նախագահ և գործադիր տնօրեն Մհեր Անանյանի խոսքով, ոչ թե, պարզապես, բառակապակցություն է, այլ՝ բանկի նոր փիլիսոփայություն, ոճ և մտածելակերպ: Այդ մասին նա հայտարարել Է սեպտեմբերի 24-ին դեպի Թեղենիս լեռ մամլո շրջագայության շրջանակում՝ բանկի աշխատակիցների, Հայաստանի ֆինանսական համակարգի եւ ԶԼՄ-ների ներկայացուցիչների մասնակցությամբ, որոնք միասին ամենագնաց մեքենաներով հաղթահարել են 3 հազար մետր բարձրություն, ինչը շատ խորհրդանշական իրադարձություն էր եւ համապատասխանում էր բանկի կողմից ընտրված կարգախոսին:

 

Թեղենիս լեռան գագաթին Մհեր Անանյանը տեղադրել է նոր ԱՐԱՐԱՏԲԱՆԿ-ի դրոշը, որի լոգոյի տեսողական փոփոխություններն իրենց մեջ կրում են նոր եռանդ, հայեցակարգ եւ մոտեցումներ, որոնցով բանկը մտադիր է հասնել "նոր բարձունքների":

 

"ԱՐԱՐԱՏԲԱՆԿ-ի նոր կոնցեպտի հիմնական խորհրդանիշը բարձրությունն է։ Իսկ "Բարձրանում ենք միասին" կարգախոսը հիմք է հանդիսանում բանկ-աշխատակից, բանկ- գործընկեր, բանկ-պետություն, բանկ-հաճախորդ հուսալի և ամուր փոխհարաբերությունների համար, որոնք հիմնված են փոխադարձ վստահության վրա: Ագրեսիվ «վաճառող» կարգավիճակից մենք մտադիր ենք դառնալ «ընկեր-խորհրդատու» հաճախորդների համար: Մեր բոլոր գործողությունները պետք է հենվեն միասնության գաղափարի վրա", - ասել է նա։

Պատասխանելով ԱրմԻնֆո-ի թղթակցի հարցին՝ բանկի վարչության ղեկավարը նշել է, որ ռեբրենդինգից եւ նոր գաղափարախոսության ներդրումից հետո, գործունեության ուղղությունների, սակագների եւ ծառայությունների առումով չեն կարող լինել "նոր երեւակայություններ", քանի որ Հայաստանի բոլոր բանկերում աշխատում են պրոֆեսիոնալներ, եւ խիստ մրցակցության պայմաններում մշակվում են նոր ապրանքներ, փոխվում են ռազմավարություններ եւ այլն: "Հարցն այն է, թե ում հետ ենք առաջ ընթանալու: Ֆինանսական տեսանկյունից բանկի ռազմավարությունը փոխվում է ամեն տարի, սակայն նոր բրենդը մեզ ստիպում է ռազմավարության ծրագրեր իրականացնել նոր արժեքներ ունեցող հասարակայնության հետ, որը հասկանում է, որ դրանց հաջողությունը կախված է հենց իրենից: Մենք ուզում ենք քայլ անել և ասել, որ բաց ենք հասարակության յուրաքանչյուր անդամի համար, ով վստահ է իր վրա և չի շեղվում արժեքներից", - պարզաբանել է Մ.Անանյանը: ԱՐԱՐԱՏԲԱՆԿ-ի խորհրդի նախագահ Գրիգոր Հովհաննիսյանն, իր հերթին, ընդգծել է, որ ռեբրենդինգից հետո, նոր ֆինանսական տեխնոլոգիաների ներդրումից զատ, կձեւավորվի կոնցեպտ, որը նախատեսում է կողմնորոշում դեպի մարդը, այսինքն՝ անհատական մոտեցման կիրառում: Նման մոտեցման շնորհիվ բանկն օբյեկտիվորեն կարող է կրկնապատկել հաճախորդների բազան, որն այսօրվա դրությամբ գերազանցում է 200 հազարը, նշել է խորհրդի նախագահը՝ պատասխանելով ԱրմԻնֆո-ի թղթակցի հարցին:

 

"Սա նշանակում է, որ մեր բանկը դառնալու է մի ինստիտուտ, որն ակտիվորեն ներդնելու է նորագույն տեխնոլոգիաներ և համընթաց է գնալու համաշխարհային միտումներին՝ ներդնելով բնապահպանական պատասխանատվության վրա հիմնված ֆինանսական լուծումներ: Այդ համատեքստում ավանդական բանկը դառնում է "կանաչ" բանկ, որի կենտրոնում գտնվում են մարդն ու մոլորակը", - ասել է նա։ "Կանաչ" բանկ լինելը, ըստ խորհրդի նախագահի, սկզբունքային նշանակություն ունի։ Պատասխանելով ԱրմԻնֆո-ի թղթակցի հարցին, Գ. Հովհաննիսյանը պարզաբանել է, որ այս հայեցակարգը նախատեսում է արեւային էներգիայի հետ կապված վարկային ապրանքների զարգացում, որոնք ուղղված կլինեն ոչ միայն կորպորատիվ հաճախորդներին, այլեւ անհատ օգտատերերին: Լիովին չբացահայտելով գաղտնիքները՝ Գ.Հովհաննիսյանը պատմել է, որ բանկը մտադիր է նաեւ հանրամատչելի դարձնել  հասարակայնության կողմից էլեկտրամոբիլների օգտագործումը:

 

Նա նշել է, որ հետագայում ԱՐԱՐԱՏԲԱՆԿ-ը տեսնում է  ավելի շատ ներգրավված շրջակա միջավայրի պահպանությանն առնչվող ծրագրերում, որոնք աջակցում են երիտասարդ ընտանիքներին, գործարարներին, տեխնոլոգիական ստարտափներին, թույլ են տալիս ավելի ներառական դարձնել հասարակությունը եւ այլն:

Բացի այդ, Գ.Հովհաննիսյանն ընդգծել է, որ ելնելով այն հանգամանքից, որ հայերը համաշխարհային ազգ են, բանկը պետք է ունենա գլոբալ օրակարգ: "Մենք կցանկանայինք օգտակար լինել սփյուռքին կամ հայրենադարձներին։ Ուստի՝ ժամանակի ընթացքում ձգտելու ենք դառնալ համահայկական ծրագրերին աջակցող կազմակերպություն, համայն հայության գաղափարների իրականացման գործընկեր և կառույց: Այսօր մենք ձեռք ենք մեկնում բոլոր նրանց, ովքեր հավատում և վստահում են մեզ, որպեսզի միասին անցնենք այդ ճանապարհը", - ասել է նա։ Խորհրդի նախագահը նաեւ նշել է, որ ԱՐԱՐԱՏԲԱՆԿ-ը նախորդ կառավարումից ստացել է լավ ժառանգություն' ի դեմս 20 միջազգային գործընկերների, որոնց հետ ձեւավորվել են ամուր հարաբերություններ: Այդ կապակցությամբ նա նշել է, որ բանկի ծրագրերը ներառում են գործընկերների աշխարհագրության ընդլայնում՝ անդրատլանտյան մայրցամաքի եւ Պարսից ծոցի երկրների ընդգրկմամբ:

 

Մամուլի շրջագայության շրջանակում տեղի են ունեցել նաեւ քննարկումներ Fishbowl ձեւաչափով, որի ընթացքում ԱՐԱՐԱՏԲԱՆԿ-ի վարչության անդամ, Braind Company-ի համահիմնադիր Կարեն Բաբաջանյանը ներկայացրել է բանկի ռեբրենդինգի տեսողական փոփոխություններն ու հայեցակարգը: Խոսելով նոր լոգոյի մասին, որի վրա պատկերված է Արարատ լեռը խորհրդանշող երկու վերընթաց սյուն, նա նշել է, որ ընտրված գույները՝ սևը և դեղինը, խորհրդանշում են հավասարակշռությունն ու խստությունը ՝ թեթևության, դինամիկայի և առաջընթացի հետ մեկտեղ: Կ. Բաբաջանյանը կոչ է արել. "Յուրաքանչյուրը պետք է նվաճի իր Արարատը: Բարձրանանք միասին":

 

Նշենք, որ ԱՐԱՐԱՏԲԱՆԿ-ը երկրի ամենադինամիկ զարգացող բանկերից մեկն է: Առաջին կիսամյակի արդյունքներով՝ բանկի ակտիվների չափը կազմել է 467.5 մլն դոլար, որից վարկային ներդրումները՝ 307.6 մլն դոլար: Բանկի վարկային պորտֆելի 57%-ը բաժին է ընկնում կորպորատիվ վարկավորմանը (174.5 մլն դոլար), իսկ 43%-ը՝ մանրածախին (133.1 մլն դոլար):

 

Բանկի ընդհանուր պարտավորությունները կազմել են 387 մլն դոլար, ընդհանուր կապիտալը՝ 80.5 մլն դոլար: Բանկի ընդհանուր պարտավորությունների կառուցվածքի 44%-ը (169.3 մլն դոլար) բաժին է ընկնում միջազգային ծրագրերի շրջանակներում ներգրավված միջոցներին, 23.4%-ը՝ ժամկետային ավանդներին (90.6 մլն դոլար), 21.4%-ը՝ ցպահանջ ավանդներին (82.6 մլն դոլար): Ընդ որում, միայն ֆիզիկական անձանց ավանդներին (ժամկետային եւ ցպահանջ) բաժին է ընկնում բանկի պարտավորությունների 54%-  կամ ավելի քան 208 մլն դոլար՝ ապահովելով ծավալի  83%  աճ այս տարվա առաջին կիսամյակում:

 

2020թ. առաջին կիսամյակը բանկն ավարտել է 3.4 մլն դոլար զուտ շահույթով՝ 23% տարեկան աճով:

 

Հիշեցնենք, որ "ԱՐԱՐԱՏԲԱՆԿ" ԲԲԸ-ն հայկական շուկայում գործում է 2005 թվականի նոյեմբերից:  2020թ. հուլիսի 1-ի դրությամբ ԱՐԱՐԱՏԲԱՆԿ-ի մեծամասնական բաժնետեր է հանդիսանում Հայաստանում նավթի մեծածախ առեւտրով զբաղվող խոշորագույն ընկերություններից մեկը՝ "Ֆլեշը"՝ կապիտալի 72,73% բաժնեմասով: Մասնաճյուղային ցանցի ընդգրկմամբ ԱՐԱՐԱՏԲԱՆԿ-ն առաջատար հնգյակում է՝  58 գրասենյակներով: