Ռուսաստանցի փորձագետ. ԵԱՏՄ երկրների դրամավարկային քաղաքականության տարբերությունները արգելակում են եվրասիական ինտեգրման գործընթացը

Արմինֆո.  Եվրասիական տնտեսական միության երկրների դրամավարկային քաղաքականության տարբերությունները, անկասկած, արգելակում են եվրասիական ինտեգրման գործընթացը։ Այդ մասին հունվարի 29-ին Բիշքեկ-Երևան-Մինսկ-Նուր-Սուլթան տեսակամուրջի ժամանակ հայտարարել է Ռուսաստանի գիտությունների ակադեմիայի Տնտեսագիտության ինստիտուտի հետխորհրդային հետազոտությունների սեկտորի վարիչ, ՌԴ կառավարությանն առընթեր Ֆինանսական համալսարանի դոցենտ Արտյոմ Պիլինը։

Նրա խոսքով ՝ տարբերությունները զգալի են նավթի եւ գազի շուկայում վատթարացող կոնյունկտուրայի ֆոնին։ ԵԱՏՄ հիմնական նավթ ու գազ արտահանողները՝ ի դեմս Ռուսաստանի և Ղազախստանի, էակապես արժեզրկում են իրենց ազգային արժույթները՝ նվազող եկամուտները փոխհատուցելու համար։ Միեւնույն ժամանակ, ներկրող երկրները, որոնց թվին է պատկանում նաեւ Հայաստանը,  այդ արժեզրկումներին դիմակայելու սահմանափակ հնարավորություններ ունեն՝ ներմուծումից մեծապես կախյալության պատճառով։ Եվ այստեղ, ըստ Արտյոմ Պիլինի, շահերի բախում է առաջանում։ Երբ արժեզրկվում են ռուսական ռուբլին և ղազախական տենգեն, դա էապես վատացնում է Հայաստանի համար առևտրի պայմանները։ Բայց, փորձատի համոզմամբ,  պետք է հասկանալ, որ միասնական դրամավարկային քաղաքականության վարումը ԵԱՏՄ երկրների Կենտրոնական բանկերի իրավասությունն է։ Հնարավոր է, որ այս հարցում իր խոսքը պետք է ասի Եվրասիական տնտեսական հանձնաժողովը, որը պետք է կոշտ դիրքորոշում որդեգրի, որպեսզի այդ քաղաքականությունը համաձայնեցված բնույթ կրի։

Իր հերթին՝ հայ տնտեսագետ Աշոտ Թավադյանը գտնում է, որ այլ պետությունների արժույթների նկատմամբ հայկական դրամի փոխարժեքը էական փոփոխությունների չի ենթարկվի: Նրա կարծիքով ՝ երկրի Կենտրոնական բանկը նորմալ կարգավորում է այդ գործընթացը։ Սակայն, անորոշության պայմաններում, ըստ փորձագետի, դրամի փոխարժեքի որոշ տատանումներ չեն բացառվում։

Նման տեսակետ ունի նաև մեկ այլ հայ տնտեսագետ՝ Թաթուլ Մանասերյանը, ով մատնանշել է այս հարցում օբյեկտիվ և սուբյեկտիվ գործոնների առկայությունը։ Նա նշել է, որ այս տարի սպասվում է մասնավոր փոխանցումների որոշակի աճ, ինչպես նաեւ միջոցների ներհոսք մի շարք միջազգային կառույցներից, այդ թվում ՝ ԵԱԶԲ-ից եւ ՎԶԵԲ-ից: