Արմինֆո. Հայաստանում կանոնավոր ուղևորափոխադրումների տարեկան սպասարկման համար սահմանված տարեկան պետական տուրքը փոխարինվում է ծառայության իրավունքի տրամադրման համար սահմանված միանվագ պետական տուրքով՝ 100 հազար դրամ: Ազգային ժողովը դեկտեմբերի 10-ին երկրորդ եւ վերջնական ընթերցմամբ ընդունել է "Պետական տուրքի մասին" եւ "Ավտոմոբիլային տրանսպորտի մասին" օրենքներում փոփոխություններ կատարելու մասին օրենքի նախագիծը:
Ինչպես ավելի վաղ հայտարարել է ՀՀ տարածքային կառավարման և ենթակառուցվածքների նախարարի տեղակալ Արմեն Սիմոնյանը, 2014 թվականին օրենսդրական փոփոխություններ կատարելով կանոնավոր ուղևորափոխադրումների կազմակերպման լիցենզիա ստանալու պահանջը հանվել է, իսկ տարեկան պետական տուրքի պահանջը պահպանվել է: Մինչդեռ, գոյություն ունի պետական տուրք տարբեր ոլորտներում գործունեության իրականացման համար անժամկետ լիցենզիաների եւ գործունեության իրականացման միանվագ վճարի ՝ գործունեության ողջ (որոշակի) ժամանակահատվածի համար: Այսպիսով, կառավարությունն առաջարկում է նման մոտեցում կիրառել կանոնավոր ուղևորափոխադրումների երթուղիների սպասարկման իրավունքի տրամադրման դեպքում, քանի որ երթուղիների սպասարկման իրավունքը մրցութային կարգով տրվում է որոշակի ժամկետով:
Առաջարկվող փոփոխության համաձայն, ինչպես նշել է փոխնախարարը, կանոնավոր ուղեւորափոխադրումների տարեկան սպասարկման համար տարեկան պետական տուրքը փոխարինվում է սպասարկման իրավունքի տրամադրման դիմաց միանվագ պետական տուրքով: "Այսինքն, ոչ թե տարեկան, այլ մեկանգամյա տուրք: Թույլտվությունը ստացվել է, հարյուր հազար դրամ վճարվել է, տարեկան վճարն այլևս չի վճարվում", - նշել է նա։
