Հայաստանի ֆինանսների նախարարը Լոնդոնում հանդիպել է ՎԶԵԲ-ի նախագահի հետ

Արմինֆո.ՀՀ ֆինանսների նախարար Վահե Հովհաննիսյանի գլխավորած պատվիրակությունը, ի դեմս Երևանի քաղաքապետ Տիգրան Ավինյանի, ՀՀ տարածքային կառավարման և ենթակառուցվածքների նախարար Դավիթ Խուդաթյանի և Կենտրոնական բանկի նախագահի տեղակալ Հովհաննես Խաչատրյանի, Լոնդոն կատարած աշխատանքային այցի շրջանակներում հանդիպել է Վերակառուցման և զարգացման եվրոպական բանկի (ՎԶԵԲ) նախագահ Օդիլ Ռենո-Բասոյի հետ:

Նախարար Հովհաննիսյանը նախ շնորհակալություն է հայտնել ՎԶԵԲ նախագահին արդյունավետ համագործակցության համար, որի արդյունքում 2024 թվականին Հայաստանին ուղղված ՎԶԵԲ ներդրումները հասել են ռեկորդային 400 մլն եվրո սահմանաչափի:

ՀՀ ֆինանսների նախարարության հաղորդագրության համաձայն, անդրադառնալով ՎԶԵԲ կապիտալի մեծացման գործընթացին Հայաստանի մասնակցության թեմային, Վահե Հովհաննիսյանն ընգծել է Հայաստանի՝ կառույցի առաքելությանը սատարելու պատրաստակամությունը։

Նախարարի գլխավորած պատվիրակությունը հանդիպումներ է ունեցել նաև ՎԶԵԲ առանձին մասնագիտական թիմերի հետ և քննարկել ՀՀ պորտֆելում առկա կարևոր ենթակառուցվածքային ծրագրերի առաջընթացը, ինչպես նաև առկա խնդիրները:

Վերակառուցման և զարգացման եվրոպական բանկը Հայաստանում առաջատար ինստիտուցիոնալ ներդրողն է. այսօրվա դրությամբ ՎԶԵԲ-ը  Հայաստանում 224 ծրագրերի շրջանակներում կատարել է 2,6 միլիարդ եվրոյի ներդրում, որի  84 տոկոսը՝ մասնավոր հատվածում։

Մարտի սկզզբին ՎԶԵԲ-ը հրապարակել է 2025-30 թթ. համար Հայաստանի ներդրումային ռազմավարությունը։ ՎԶԵԲ-ի երկու հիմնական ներդրումային առաջնահերթությունները կլինեն աջակցությունը ավելի ներառական և մրցունակ մասնավոր հատվածի զարգացմանը երկրում, ինչպես նաև կայուն ենթակառուցվածքների խթանման միջոցով կանաչ տնտեսությանն անցման արագացումը։

Ինչպես ասվում էր բանկի պաշտոնական հաղորդագրությունում, բանկը նախորդ՝ 2019-2024 թթ. Հայաստանում ներդրել է մոտ 1 միլիարդ եվրո՝ նպաստելով զգալի տնտեսական առաջընթացին։ Միայն 2024 թվականին ՎԶԵԲ-ը երկրում ներդրել է ռեկորդային 396 միլիոն եվրո՝ առանձնահատուկ ուշադրություն դարձնելով մասնավոր հատվածի զարգացմանը և ենթակառուցվածքներին աջակցությանը՝ Հայաստանի առևտրային հնարավորությունները խթանելու նպատակով։

Ինչպես նշվում էր հաղորդագրությունում, վերջին մի քանի տարիների ընթացքում Հայաստանի տնտեսությունը զգալի աճ է արձանագրել՝ չնայած բազմաթիվ տնտեսական և աշխարհաքաղաքական մարտահրավերներին։ Բանկի նոր ռազմավարությունն ուղղված է այս դինամիկան շարունակելուն՝ միևնույն ժամանակ լուծելով առկա խնդիրները, ինչպիսիք են տնտեսության ցածր դիվերսիֆիկացիան և միջազգային շուկաներին սահմանափակ հասանելիությունը։

ՎԶԵԲ-ը կշարունակի Հայաստանի զարգացմանն աջակցել ներդրումների և քաղաքական երկխոսության միջոցով։ Ռազմավարության առաջին առաջնահերթությունը մասնավոր հատվածի ներառականության և մրցունակության բարձրացումն է՝ ֆինանսական միջնորդության բարելավման, փոքր և միջին ձեռնարկություններին, ինչպես նաև փախստականներին և նրանց ընդունող համայնքներին ուղղված նպատակային աջակցության և առևտրի դիվերսիֆիկացման խթանման միջոցով։ Երկրորդ առաջնահերթությունը հանդիսանում են ներդրումները կայուն ենթակառուցվածքներում՝ կանաչ տնտեսությանն անցումը արագացնելու նպատակով։ Սա կներառի էներգաարդյունավետության նախաձեռնությունների ֆինանսավորումը, Բանկի «Կանաչ քաղաքներ» ծրագրի ընդլայնումը և էներգետիկ անվտանգության բարձրացումը՝ շեշտադրելով վերականգնվող էներգիայի լուծումները։

Լրացուցիչ ջանքեր կգործադրվեն Հայաստանի համար ազգային մակարդակով սահմանված գործողությունների (NDCs) և ցածր ածխածնային զարգացման ուղիներին աջակցման համար։