ՀԾԿՀ. ՀԷՑ-ի վերաբերյալ որոշում կարող է կայացվել նաև այսօր

Արմինֆո. ՀՀ հանրային ծառայությունները կարգավորող հանձնաժողովը Տարածքային կառավարման և ենթակառուցվածքների նախարարությունից բողոք է ստացել "Հայաստանի էլեկտրական ցանցեր" փակ բաժնետիրական ընկերության գործունեության վերաբերյալ:

Ինչպես ԱրմԻնֆո-ի թղթակցին հաղորդել է ՀԾԿՀ մամուլի քարտուղար Լիանա Ազիզյանը, գործող օրենսդրության համաձայն, ցանցերի նկատմամբ վարույթ սկսելու մասին որոշումը պետք է կայացնի հանձնաժողովի նախագահը: Մինչև վարույթի ավարտը կարող է նշանակվել ընկերության կառավարիչ: "Չեմ կարող ասել, թե կոնկրետ երբ դա տեղի կունենա, հնարավոր է, այսօր, գուցե նաև՝ երկուշաբթի, հետևեք մեր կայքի հաղորդագրություններին", - ասել է մամուլի քարտուղարը:

Հիշեցնենք, որ ավելի վաղ Պետական վերահսկողական ծառայության պետի պաշտոնից ազատվել էր Ռոմանոս Պետրոսյանը, ով, ըստ ԶԼՄ-ների, հնարավոր է, նշանակվի  "ՀԷՑ" ՓԲԸ կառավարիչ:

Հիշեցնենք, որ հուլիսի 8-ի վաղ առավոտյան իրավապահները ներխուժել էին ՀԷՑ-ի գլխամասային գրասենյակ, որը 2016 թվականից "Տաշիր" ընկերությունների խմբի կազմում է: "Տաշիր" ընկերությունների խմբի նախագահ Սամվել Կարապետյանը կալանավորվել է Հայաստանի իրավապահ մարմինների կողմից՝ Հայ Առաքելական Եկեղեցուն աջակցություն հայտնելուց հետո: Հետո ԱԺ օրակարգ բերվեց մի օրինագիծ, որով հիմք է դրվում "Հայաստանի էլեկտրական ցանցեր" ՓԲԸ ազգայնացման համար։