Ակնկալվում է, որ Ռուսաստանից և Ղազախստանից դեպի Հայաստան հետագա բեռնափոխադրումները կիրականացվեն Ադրբեջանի տարածքով. ԱԵՈՒ

Արմինֆո. Ղազախական ցորեն փոխադրող գնացքը Ադրբեջանից ուղևորվել է Հայաստան: Ադրբեջանական լրատվամիջոցների հաղորդումների համաձայն, գնացքն արդեն մեկնել է Բալաջարի կայարանից։

Նշվում է, որ բեռնատար շարժակազմը կշարունակի երթևեկել Բալաջարա-Հաջիգաբուլ-Բույուկ-Քյասիկ երթուղով, որտեղից բեռը կհասցվի Վրաստան, այնտեղից էլ՝ Հայաստանի Դալարիկ կայարան: Ավելի վաղ Բալաջարայի երկաթուղային կայարան էր ժամանել 15 վագոնից բաղկացած բեռնատար գնացքը՝ բեռնված 1048,8 տոննա ցորենով:

"Երեկ Ռուսաստանից Ադրբեջանով տարանցմամբ Հայաստան է ուղարկվել 15 երկաթուղային վագոն ՝ 1048,8 տոննա հացահատիկով։ Բեռը փոխադրվում է Վրաստան, իսկ այնտեղից ՝ Հայաստան", - լրագրողներին հաղորդել է "Ադրբեջանական երկաթուղիներ" ՓԲԸ հասարակայնության հետ կապերի բաժնի պետ Բախտիյար Հաջիևը։

Նա նաև հաղորդել է ղազախական հացահատիկի՝ Ադրբեջանով տարանցմամբ Հայաստան փոխադրման մեկնարկի մասին: Նոյեմբերի 5-ին Ղազախստանից Ադրբեջան է ժամանել մոտ 1000 տոննա հացահատիկով բեռնված 15 վագոն: "Ակնկալվում է, որ Ռուսաստանից և Ղազախստանից դեպի Հայաստան հետագա բեռնափոխադրումները կիրականացվեն Ադրբեջանի տարածքով", - ասել է Հաջիևը:

Հարկ է հավելել, որ ռուսական հացահատիկով բեռնված գնացքն արդեն ժամանել է Հայաստան՝ անցնելով Ադրբեջանի և Վրաստանի տարածքով։