Գերմանիան մինչև 2027 թվականը Հայաստանին կտրամադրի 152 մլն եվրո՝ ի աջակցություն ռազմավարական համագործակցության. ԳԴՀ դեսպանատուն

Արմինֆո. Գերմանիան մինչև 2027 թվականը Հայաստանին կտրամադրի 152 մլն եվրո ռազմավարական համագործակցությանն աջակցության համար։ 2025 թվականի հոկտեմբերի 31-ին Գերմանիան և Հայաստանը հաջողությամբ ավարտել են միջկառավարական երկրորդ բանակցությունները։ Այդ մասին ասվում է Հայաստանում Գերմանիայի Դաշնային Հանրապետության դեսպանության հաղորդագրությունումեջ:

Գերմանական պատվիրակության ղեկավար և Գերմանիայի Դաշնային Հանրապետության տնտեսական համագործակցության և զարգացման նախարարության (BMZ) պետքարտուղար Նիլս Անենը նշել է. «Հայաստանի հետ համագործակցության մեջ մեր գերակա քաղաքական խնդիրը հետայսու ևս լինելու է այն աջակցությունը, որ ցուցաբերում ենք ընթացիկ ժողովրդավարական բարեփոխումներին և սոցիալական առումով ներառական, բնապահպանական առումով հավասարակշռված տնտեսական զարգացմանը՝  առաջնորդվելով քաղաքական կայունությանը և խաղաղությանը միտված Կենսակայուն զարգացման նպատակներով (Sustainable Development Goals)։ Դրա էական բաղադրիչն է, որ, կարևորելով ԵՄ-Հայաստան գործընկերության խորացումը, խթանենք ԵՄ նորմերին և չափանիշներին Հայաստանի համապատասխանեցումը։ Ավելին՝ բարեփոխումներին ուղղված բոլոր ջանքերը պետք է իրենց անմիջական նպաստը բերեն հայ ժողովրդին։ Միայն այս հիմքով է հնարավոր, որ խաղաղության ամրապնդմանն ուղղված ջանքերը և սահմանների հնարավոր բացումը կայուն ու հարատև լինեն Հայաստանի ողջ հանրության համար»։

Գերմանիան և Հայաստանը առաջիկա երկու տարիների համար համաձայնության են եկել հետևյալ ռազմավարական ոլորտների շուրջ․

Մասնավոր հատվածի զարգացման, ինչպես նաև միջին-մասնագիտական ​​կրթության ու վերապատրաստման, միկրո, փոքր և միջին ձեռնարկությունների և հասարակության խոցելի խմբերի աջակցության նպատակով կտրամադրվի 75 միլիոն եվրո․ աջակցությունը կուղղվի հատկապես գյուղական վայրերին։ Կենտրոնական բանկի Գերմանահայկական ֆոնդին (GAF) տրամադրվելիք նոր վարկի շնորհիվ միկրո, փոքր և միջին ձեռնարկություններն ավելի լայն հասանելիություն կունենան տեղական արժույթով վարկերին՝ արդիականացնելու իրենց ձեռնարկությունները, ամրապնդելու իրենց մրցունակությունն ու արտահանման հնարավորությունները, միաժամանակ երաշխավորելու աշխատատեղերի կայունությունն ու ստեղծելու նոր աշխատատեղեր։ Վարկը կուղղվի նաև կանանց ղեկավարությամբ գործող տնտեսություններին, գյուղական վայրերում գործող ձեռնարկություններին, ինչպես նաև տեղահանված անձանց կողմից բացված ձեռնարկություններին։ Գերմանիան Հայաստանի տնտեսությանը կաջակցի նաև կանաչ և թվային խելացի լուծումներով, շրջանաձև և կանաչ բիզնես մոդելներով, ինչպես նաև կօգնի զարգացնել ձեռնարկատիրական հմտություններ՝ խթանելով հատկապես կանանց ձեռներեցությունը։ Տեխնիկական և մասնագիտական ​​վերապատրաստման շրջանակում քոլեջների ուսումնական ծրագրերի մշակումը խստորեն կհամապատասխանեցվի մասնավոր հատվածի կարիքներին։ Դա կնպաստի Հայաստանի երիտասարդ սերնդի համար բարեկեցիկ աշխատանքային հնարավորությունների ստեղծմանը և հայկական ընկերությունների համալրմանը որակավորված մասնագետներով։

Ընդհանուր առմամբ 66 միլիոն եվրո վարկերի և դրամաշնորհների տեսքով հատկացնելով արդար անցման, էներգաարդյունավետության և վերականգնվող էներգետիկայի նախագծերի համար ՝ Գերմանիան Գերմանա-հայկական հիմնադրամի միջոցով նոր վարկեր կտրամադրի մասնավոր հատվածին ՝ հեռանկարային էներգաարդյունավետ տրանսպորտային միջոցներում և համակարգերում, վերականգնվող էներգետիկայի լուծումներում, ինչպես նաև կուտակիչ մարտկոցներում ներդրումներ կատարելու համար: Գերմանիան նաև կօգնի Հայաստանի գյուղական համայնքներին ներդնել կայուն, ծախսարդյունավետ և կլիմայական կայուն էներգետիկ լուծումներ հասարակական շենքերում և տնային տնտեսություններում, որոնք բավարարում են բնակչության կենսական կարիքները:

Արդյունավետ կառավարման և համայնքների համապարփակ զարգացման շրջանակներում Գերմանիան լրացուցիչ 5,6 միլիոն եվրո կհատկացնի պետական կառավարման բարեփոխումների համար, ներառյալ արդյունավետ ֆինանսական կառավարումը, պետական կառավարման ռազմավարական բարեփոխումները և ապակենտրոնացման բարեփոխումները, մասնավորապես, գյուղական համայնքների պատասխանատվության և դերի ուժեղացման և մասնակցային բյուջետավորման բարելավման համար: Իրենց համայնքներում որոշումների կայացման գործում ՀՀ քաղաքացիների դերի բարձրացման նպատակով միջոցներ կարող են հատկացվել այն հարցերի համար, որոնք առավել արդիական են համայնքների անդամների տեսանկյունից: Դա կնպաստի ժողովրդավարության ամրապնդմանը։

Ջրային ռեսուրսների կառավարման և սանիտարական մաքրման թեման դարձել է նաև Բեռլինի բանակցություններում ազդեցիկ քաղաքական երկխոսության առարկա: 4 միլիոն եվրո դրամաշնորհ տրամադրելով՝ Գերմանիան կշարունակի աջակցել ջրային ռեսուրսների կառավարման ոլորտին և համապատասխան իրավական կանոնակարգերի մշակմանը ՝ առաջարկելով հարմարեցված լուծումներ սանիտարական ոլորտում, հատկապես, գյուղական համայնքներում:

Գերմանիան նաև Հայաստանի կարևոր գործընկերն է լինելու 2026 թվականին սպասվող խոշոր քաղաքական իրադարձությունների համատեքստում ։ Լրացուցիչ աջակցություն կցուցաբերվի Կենտրոնական ընտրական հանձնաժողովին և քաղաքացիական հասարակությանը ՝ ազատ և արդար խորհրդարանական ընտրությունների կազմակերպման գործում, ինչպես նաև Հայաստանի Հանրապետության կառավարությանը ՝ նախապատրաստվելու հոկտեմբերին կայանալիք կենսաբազմազանության վերաբերյալ COP17 համաժողովին:

Հիշեցնենք, որ վերջերս Բեռլինում տեղի է ունեցել հայ-գերմանական հանձնաժողովի նիստը, որի ժամանակ  որոշում է կայացվել աջակցել Հայաստանի կառավարությանը: