Հայաստանն ու Իրանը քննարկել են զբոսաշրջության ոլորտում փոխգործակցության հեռանկարները

Արմինֆո.  Սաուդյան Արաբիայում անցկացվող ՄԱԿ Զբոսաշրջության համաշխարհային կազմակերպության (UNWTO) Գլխավոր ասամբլեայի 26-րդ նիստի շրջանակում ՀՀ էկոնոմիկայի նախարար Գևորգ Պապոյանը զրուցել է ունեցել Իրանի Իսլամական Հանրապետության մշակութային ժառանգության, զբոսաշրջության և ձեռարվեստի նախարար Սեյեդ Ռեզա Սալեհի Ամիրիի հետ։Ներկա է եղել նաև ՀՀ ԷՆ Զբոսաշրջության կոմիտեի նախագահ Լուսինե Գևորգյանը:

ՀՀ էկոնոմիկայի նախարարության հաղորդագրության համաձայն, Գևորգ Պապոյանը նշել է, որ Հայաստանը կարևորում է Իրանի հետ դարավոր համագործակցության արդյունքում ձևավորված սերտ համագործակցությունը։

Զրուցակիցները քննարկել են երկու երկրների միջև առկա հարաբերությունների ընդլայնմանը վերաբերող հարցեր, այդ թվում՝ զբոսաշրջության ոլորտում փոխգործակցության հեռանկարները, երկու երկրների մշակութային հարուստ ժառանգության և զբոսաշրջային մեծ ներուժի վերաբերյալ ճանաչելիության բարձրացմանը, զբոսաշրջային հոսքերի ավելացմանը վերաբերող մի շարք թեմաներ։

Նշենք, որ ՀՀ Վիճակագրական կոմիտեի տվյալների համաձայն՝ 2025թ. հունվար-սեպտեմբերին Իրանից Հայաստան է այցելել ավելի քան 138 հազար զբոսաշրջիկ, ինչը 1,1 տոկոսով գերազանցում է նախորդ տարվա ցուցանիշը։

Ընդհանուր առմամբ՝ զբոսաշրջային հոսքն աճել է 0,8%-ով՝ մինչեւ 1,734 մլն մարդ։