Արմինֆո. Հայաստանը մտադիր է միանալ «Եվրասիական տրանսպորտային միջանցքներում ներառված` Եվրասիական տնտեսական միության անդամ պետությունների ավտոմոբիլային ճանապարհներով երթեւեկող տրանսպորտային միջոցների թույլատրելի զանգվածների, սռնիների բեռնվածքի եւ եզրաչափերի մասին» համաձայնագրին: ՀՀ Ազգային ժողովի Եվրասիական և տարածաշրջանային ինտեգրման հանձնաժողովը նոյեմբերի 24-ի նիստում դրական եզրակացություն է տվել ՀՀ կառավարության ներկայացրած համաձայնագրի նախագծին:
ՀՀ տարածքային կառավարման և ենթակառուցվածքների նախարարի տեղակալ Արմեն Սիմոնյանի խոսքով ՝ Հայաստանի կառավարությունը նպատակահարմար է գտնում վավերացնել համաձայնագիրը, որով, փաստացի, փորձ է արվում ազգային օրենսդրությունը ներդաշնակեցնել ԵԱՏՄ անդամ պետությունների օրենսդրությանը և կիրառել միջազգայնորեն ճանաչված ստանդարտներ: Փաստաթղթի վավերացումը թույլ կտա հավասար պայմաններ ստեղծել եվրասիական տրանսպորտային միջանցքներով փոխադրումներ իրականացնող հայկական փոխադրողների համար: Ներկայացված փաստաթղթի նպատակն է վերացնել միության ներքին առևտրում արգելքները, որոնք կապված են տրանսպորտային միջոցների կշռաչափային պարամետրերի նկատմամբ ազգային պահանջների տարբերությունների հետ ։ Այն սահմանում է զանգվածի, սռնիների բեռնվածքի եւ եզրաչափերի միասնական նվազագույն թույլատրելի արժեքները եվրասիական տրանսպորտային միջանցքների մեջ մտնող ճանապարհների համար ։ Նորմերի ներդաշնակեցումը թույլ է տալիս փոխադրողներին խուսափել հատուկ թույլտվություններ ստանալու անհրաժեշտությունից այն երկրներում, որտեղ նախկինում գործել են ավելի ցածր ստանդարտներ, ինչը հեշտացնում և էժանացնում է միջազգային փոխադրումները:
Նշենք, սակայն, որ 2025 թվականի նոյեմբերի դրությամբ համաձայնագիրը ստորագրվել է, սակայն դեռևս ուժի մեջ չի մտել ԵԱՏՄ անդամ բոլոր պետությունների համար ։ Համաձայնագիրը կիրառվում է միայն այն ավտոմոբիլային ճանապարհների նկատմամբ, որոնք պաշտոնապես ներառված են եվրասիական տրանսպորտային միջանցքների ցանկում, որը հաստատվել է Եվրասիական տնտեսական հանձնաժողովի կոլեգիայի կողմից: Այն սահմանում է հատուկ թույլատրելի պարամետրեր տարբեր տեսակի տրանսպորտային միջոցների համար (միայնակ մեքենաներ, ավտոբուսներ, ճանապարհային գնացքներ և այլն):
