Արմինֆո. Տեղի է ունեցել Քուվեյթում ՀՀ արտակարգ և լիազոր դեսպան Արսեն Առաքելյանի հանդիպումը Քուվեյթի տնտեսական զարգացման հիմնադրամի գլխավոր տնօրեն Վալիդ ալ-Բահարի հետ։
Քուվեյթում ՀՀ դեսպանության հաղորդագրության համաձայն, հանդիպման ընթացքում դեսպան Ա․ Առաքելյանը ներկայացրել է Հայաստանում առկա տնտեսական և ներդրումային հնարավորությունները, ՀՀ կառավարության կողմից իրականացվող բարեփոխումները, ինչպես նաև երկրի հետաքրքրությունը նոր տեխնոլոգիական, արդյունաբերական և ենթակառուցվածքային ծրագրերի զարգացման հանդեպ։
Նա նաև ընգծել է, որ Հարավային Կովկասում ՀՀ կառավարության կողմից հետևողականորեն առաջ տարվող խաղաղության ու համագործակցության օրակարգը հավելյալ հնարավորություններ է բացում ինչպես Հայաստանի և տարածաշրջանի մյուս երկրների, այդպես էլ հարևան արաբական երկրների, հատկապես՝ ԾՀԽ գործընկերների համար։
Իր հերթին, Վալիդ ալ-Բահարը ողջունել է ՀՀ կառավարության կողմից այդ հետևողական աշխատանքը տանելու պատրաստակամությունը և հայտնել է, որ Քուվեյթի Պետությունը մշտապես հետաքրքրված է եղել Հայաստանի հետ ավելի սերտ համագործակցություն ունենալու մեջ և ցանկություն է հայտնել ավելի շատ տեղեկություններ ունենալ այստեղ իրականացվող տնտեսական խոշոր նախաձեռնությունների մասին։
Բացի այդ, նա ընգծել է, որ Հայաստանի և Ծոցի Համագործակցության Խորհրդի ինստիտուցիոնալ համագործակցության մակարդակը բարձրացնելու ժամանակը հասունացել է և նա անձամբ, լինելով ԾՀԽ ֆինանսական մի շարք մարմինների անդամ, կաջակցի ՀՀ հետ համագործակցության սերտացմանը։
Պայմանավորվածություն է ձեռք բերվել առաջին քայլերն իրականացնել այդ ուղղությամբ՝ մյուս 2026 թ․ ընթացքում շոշափելի արդյունքներ ունենալու ակնկալիքներով։
